Mauie Flores

Read More

Ang aking lahok para sa Pinoy Top Ten ngayong linggong ito.

Sabi naming mag-asawa sa aming anak, bago natin libutin ang mundo, pasyalan muna natin ang buong Pilipinas. Kahit paano, masasabi kong mayroon rin naman akong napasyalang magagandang lugar sa Pilipinas. Yun nga lang, halos lahat iyon ay sa Luzon. Aklan pa lang ang narating ko sa Visayas at ni wala pang isang lugar sa Mindanao.

1. Boracay, Aklan. Kakaiba ang pakiramdam ng pag-apak sa pinong puting buhangin ng Boracay. Maswerte kamiing magkakapatid na makailang beses na kaming nakapunta dito. Akeanon kasi ang aking ama, isang oras na byahe lang ang Caticlan mula sa kanilang bahay sa Makato. Nung lumaki na kami, kumuha ang aking ina ng kwarto sa isang hotel doon para permanente naming tuluyan sa Boracay.

2. Mayon Volcano. Dahil naman Bicolana ang aking ina at pati na rin ang aking asawa, madalas akong nakakauwi ng Bicol. Pero sa buong buhay ko, 2 beses ko pa lang nakikita ang Mayon. Maswerte nga ang huli kong punta noong 2006. Dahil makatapos ang ilang araw ay dumating ang bagyo na sumalanta sa Daraga, Albay. Mas nabaon na raw ang simbahan ng Cagsawa sa lupa dahil dito.

3. Baguio. Maraming beses na rin akong nakarating ng Baguio pero ang huli naming pagbisita sa lugar na ito ang pinaka naging kakaiba. Hindi namin masyadong nilibot ang mga nakasanayan nang pasyalan sa Metro Baguio. Gumawa ang ate ko ng aming itinerary at talagang nag-research siya ng mga kakaibang puntahan sa Baguio kaya maraming naging bago sa aking paningin. Isa na dito ang Maryknoll Eco Sanctuary at ang pag-swimming namin sa Asin Hot Springs.

4. Hundred Islands, Pangasinan. "High tide or low tide?", tanong ni Charlene Gonzales sa judges noong siya ay kalahok sa Miss Universe. "Low tide!" naman ang sagot ko. Maganda mag-island hopping pag low tide sa Hundred Islands. Ang iba ngang isla, nilalakad na lang para marating at di na kinailangan pang mag-bangka.

5. Hidden Valley. Isang beses pa lang ako nakarating sa tagong kayamanan na ito ng
Laguna. Company outing noon sa opisina ng aking ina kaya kami ay nakasama. Hindi ko makakalimutan ang aming pagkain ng tanghalian sa mga mesa at upuan na nakatayo sa mismong batis nila.

6. Manila Bay. Maganda sa Baywalk lalo na kung palubog na ang araw. Maingay man at matao dahil sa dami ng sasakyang dumadaan at mga taong namamasyal, kakaiba pa rin ang kapayapaang idinudulot sa kaisipan ng panonood sa palubog na araw.

7. Angono, Rizal. Kapag ikaw ay nakarating na sa bayan ng Angono, iisipin mong nakabalik ka sa nakaraan. Bukod sa napapaligiran ka na ng napakaraming art galleries sa bayan ng mga henyong ito, maaaliw ka rin sa mga kabahayan na luma pa ang arkite

8. Subic, Zambales. Iba ang ugali ng Pinoy kapag nasa Subic na sabi nga ng ilan. Marunong na raw kasi sumunod sa mga batas dahil sa takot na makulong. Ang mga batas na ito ang nakatulong na mapanatiling malinis at maganda ang dating base militar na ito. Nakakatuwang alaala rin para sa akin ang mga tumatawid na unggoy sa kalsada noong unang dalaw ko sa lugar. Inaalagaan daw kasi talaga nila ang mga ligaw na hayop na likas na katutubo ng mga kagubatang pumapalibot dito.

Hindi pa ako nakakarating sa dalawang huling magagandang pook na ito pero talagang binabalak naming pumasyal dito basta't tama na ang oras at ang ipon namin.

9. Bohol. Gusto kong maranasan na kumain ng tanghalian sa bangka habang binabagtas ang Loboc River. Gusto ko rin makita na ng personal ang Chocolate Hills.

10. Palawan. Matagal na naming pangarap mag-asawa na mag-nature tripping sa lugar na ito. Hindi ang beach resorts ang umaakit sa akin na bisitahin ang lugar kundi ang mga kweba na maaring pasyala habang nakasakay sa bangka.

Napuntahan mo na rin ba ang mga magagandang lugar na napuntahan ko? Anong mga magagandang lugar sa Pilipinas ang pinapangarap mo ring mapuntahan?

Read More

Ang aking lahok para sa Pinoy Top Ten ngayong linggong ito.

Hindi maipagkakailang masarap ang pagkaing Pinoy. Sabihin man nilang marami sa ating mga pagkain ay minana na natin sa mga dayuhang sumakop sa ating bansa sa ating kasaysayan. Magkaganunpaman, higit kong ipinagmamalaking hinubog pa rin nating ito ayon sa ating panlasa. Kung mapapansin niyo pa, marami sa ating mga pagkain ang hindi aakalaing kinakain pala kung iisipin ng mga dayuhan sa ibang bansa. Marami kasi sa mga pagkaing ito ang nagpapakita ng pagiging masinop ng Pinoy. Ultimo nga lamang-loob ng baboy at manok napapakinabangan pa natin eh. O, natatakam na ba kayo? Tara, kain tayo...

Eto na ang unang sampung pagkaing Pinoy na aking paborito.

10. Paboritong-paborito ko ang pansit lalo
na kung ito ay miki-bihon. Sa isang handaan, mas gusto ko pang kumain nito kaysa sa spaghetti.

9. Kumakain din ba kayo ng balut? Lumaki akong laging ito ang pasalubong ng aking tatay basta siya ay baong sweldo. Gusto ko yung maliit lang ang sisiw. Napakalinamnam ng balut. Hindi ko nga maintindihan kung bakit ito ay ipinapakain sa Fear Factor samantalang hindi naman nakakatakot.

8. Gustong-gusto ko rin ang kare-kare. Nito lang ay nadiskubre kong masarap pala magluto ng kare-kare ang aking byenan. Hay naku, nasira nanaman ang aking diet. LOL!

7. Ang kaldereta ay isa ko pang paborito. Lumaki akong ang kaldereta ay niluluto lamang ng aking ina kapag Pasko. Nilalagyan niya ito ng maraming sili kaya napaka-anghang! Pero pang ang nanay ko ang nagluto ng kaldereta ay buto-buto ng baboy ang gamit niya at hindi baka. Hindi kasi siya kumakain nito.

6. Ang biko naman ay paborito kong meryenda lalo na kapag kami ay nasa probinsya. Suki rin ito sa hapag-kainan kapag undas. Gusto raw kasi ng mga kaluluwa ang mga pagkaing matatamis na iniaalay sa kanila sa kanilang kapistahan.

5. Narinig ko sa isang patalastas sa radyo na ang dinuguan ay tinawag na Chocolate Soup. Mukha nga namang tsokolate ung tutuusin ang aking paboritong pagkaing ito. Pero kapag ang nanay kong Bicolana ang nagluto, para na itong Chocolate Soup na nilagyan ng gatas evaporada. Nilalagyan kasi ng mga Bicolano ng gata ang kanilang dinuguan. Mas masarap, maniwala ka.

4. Mahilig rin ako kumain ng mga ihaw-ihaw lalung-lao na ng isaw ng manok. Sa dalawang piso isang tuhog, tapos na ang problema sa pang-ulam. Pero para maka-iwas sa hepa, bumibili lang ako ng isaw sa pwestong kilala ko. Sa Laguna noon, suki ko ang aking kapitbahay na sigurado kong malinis ang bitukang ginagamit niya dahil nakikita ko talaga kung paano niya linisin ito.

3. Alam kong bawal sa akin ang chicharon pero paminsan-minsan ay hindi ko pa rin napipigilan ang aking sarili. Lalo na kapag may sukang pinakurat! Hay! Keber sa diet diet na yan!

2. Isa rin sa aking kinababaliwan ang ginataang halo-halo. Gusto ko sa ginataang halo-halo yung maraming bilo-bilo at may timplang vanilla. Ayos na kung may kasamang sago at saging na saba at kalimutan na ang kamote. Hindi ko gusto ang pagkain ng kamote kahit kailan. Nakaka-utot pa, hehehe!

1. Mahilig ako sa mga pagkaing malalamig kaya pinaka-paborito ko sa lahat ng pagkaing Pinoy ang Halo-halo at Saging Con Hielo. Tanggal ang init ng ulo kapag ito ay aking natitikman.

O ayan, eto ang aking listahan. Ano naman ang iyo?

Read More

Isa akong guro, kung kaya't para sa aking panimulang sulatin sa aking pagsali sa Pinoy Top Ten, naisipan kong itala ang Sampung Katangiang taglay ang ating lahing Pilipino na aking ipinagmamalaki.

Naging leksyon na namin ito ng aking mga estudyante noon pang unang markahan pa lamang. Itinuturo ito sa mga mag-aarak sa asignaturang Sibika at Kultura. Sa tingin ko, hindi lamang ang mga bata ang palagiang paalalahanan ng mga katangiang ito kundi pati rin tayong mga nakatatanda. Nakakalungkot isipin na sa paglipas ng panahon ay marami nang mga Pilipino ang nakalimot sa mga magagandang katangiang ito na karapat-dapat lamang na ipagmalaki at ipagsigawan sa buong mundo.

Heto ang aking listahan:

10. Ang mga Pilipino ay matitipid. Hindi nangangahulugang kuripot ang taong matipid. Sadya lamang na marunong ang Pinoy na mamaluktot kapag maikli ang kumot.

9. Ang mga Pilipino ay mahuhusay na talento. Sino ang hindi nakakakilala kay Lea Salonga sa mundo ng teatro? Heto rin si Charice Pempengco na napahanga ang mga Amerikano sa kanyang pag-awit? Isipin mo na ang kung mapanood nila ang lahat ng mga mang-aawit natin dito sa Pilipinas at baka sila ay mapagod na sa kakapalakpak.

8. Ang mga Pilipino ay masayahin. Pansinin niyo sa mga kuha sa telebisyon tuwing may kalamidad. Hindi mawawala ang mga kuha ng mga Pinoy na nagtatawanan pa rin at nagkukulitan kahit na nahaharap sa matinding problema.

7. Ang mga Pilipino ay magalang. Kaya nga hindi ko pinapalimot sa aking anak at mga estudyante na gumamit ng "po" at "opo". Tayo lang yata ang gumagamit ng mga magagalang na kataga sa pakikipag-usap kahit na hindi sa mga nakatatanda sa atin. Hindi ba't kahit sa mga mensahe sa cellphone ay hindi mawawala ang "poh" sa mga pagbati.

6. Ang mga Pilipino ay malikhain at maparaan. Marami tayong magagaling na imbentor sa bansa. Dahilan sa hirap ng buhay sa atin, ang mga likha nila ay yaong mga makakatulong sa pagtitipid ng kuryente, tubig, at pera. Nakakalungkot lang isipin na sila pa ang hindi nabibigyan ng lubos na suporta galing sa ating pamahalaan.

5. Ang mga Pilipino ay mapagmahal sa pamilya. Hindi kumpleto ang isang okasyon kapag hindi kumpleto ang pamilya. Hindi rin natin basta-basta iniiwan ang ating mga lolo at lola sa mga bahay ng matatanda.

4. Ang mga Pilipino ay masipag at matiyaga. Kaya nga gustong-gusto ng mga dayuhan ng manggagawang Pinoy dahil na rin sa mga katangiang ito.

3. Ang mga Pilipino ay matatag. Walang anumang pagsubok ang makakapagpabagsak sa Pinoy. Sanay na tayong bumagsak, bumangon, at lumaban sa pagsubok.

2. Ang mga Pilipino ay maganda ang kalooban. Mababait ang mga Pinoy. Hindi tayo sanay na makasakit ng damdamin ng iba. Laging handang tumulong ang Pinoy sa mga nangangailangan.

1. Ang mga Pilipino ay madasalin at may takot sa Diyos. Ang ating isang buong taon ay napapalibutan ng sari-saring pagdiriwang na panrelihiyon. Kahit anumang relihiyon pa ito, hindi maipagkakailang ang Diyos (o si Allah sa mga Muslim) ang sentro ng buhay Pinoy.

Read More